Men suyib, men suyib-
kimni suyibman?
Cho' lpon

Sevgimni daryoga tashlasam agar
suvlarga qo'shilsa, ichsa baliqlar
sayragan bo'lardi bulbullar kabi.
Sahroga tashlasam, yesa ilonlar
bari parilarga aylanib qachon
malika bo'lardi shahzodalarga.
Toshbaqa totinsa, qo'shqanot bog'lab,
Ko'tarib kelardi Bog'i Eramni.
Sevgimni kechaga sochsaydim agar
oy quyosh bo'lardi,yulduz ham quyosh.
Men buyuk sevgimni senga heribman.
Baliqlaring baliq,
Iloning - ilon.
Toshbaqang - toshbaqa.
Kechaning kunduzga qadamlari sust.
Sevgim kuchsizmikin,
yo sevgim essiz?
Tillanmog'ing uchun,
uchmog'ing uchun,
kechadan batamom
kechmog'ing uchun,
Ayt, qancha xohlasang, shuncha suyarman,
Ayt, qandoq xohlasang, shundoq suyarman !