АЛАМ

Шу ҳам бизга ғаммикан,
Айрилиқ аламмикан!?
Дунёда биздан бошқа
Бахтиқаро каммикан?!

Мағрур йигит бошимиз
Эгиб кетаверасми?
Бир бор севиб кўрмасдан
Тегиб кетаверасми?

Келинликнинг либоси,
Айтинг, шунча ҳавасми?
Орзулар эҳтироси
Тугадими, абасми?

Ўтиб, балки, кўп йиллар,
Қарғайсизми қисматни?!
Қизингизда кўриб сўнг
Ўша бебош ҳислатни...

Бебош, ўтли муҳаббат
Куйдиряпти бизни ҳам.
Қани энди илитса
Сиз - шошқалоқ қизни ҳам!

Эҳ, етар, бас! Бахтингиз
Топсангиз ҳам ғаммикан!?
Дунёда биздан бошқа
Бахтиқаро каммикан?!

Ўткир Хидиров

ЁРИЖОНИМ

Қалдирғочнинг қанотлари ойга тегиб ҳўл бўлдими?!
Тошқин-тошқин сойлар тиниб сўқмоқ янглиғ йўл бўлдими?!
Ошиқларнинг кўзёшлари аччиқ-аччиқ кўл бўлдими?!
Сўқмоқларда қалдирғочнинг кўзёшлари, ёрижоним.
Ҳижронларга қолмади ҳеч на тоқат-у ҳолу-жоним.

Баргизубнинг япроқлари дардимизга малҳаммикан,
Кипригингда юз чайсин деб гуллар сепган шабнаммикан,
Бизнинг ишқдан огоҳ тунлар тилларига маҳкаммикан?!
Шармисор ишқ шодликлари биздан нари, ёрижоним,
Ҳижронларга қолмади ҳеч на тоқат-у ҳолу-жоним.

Юриб-юриб етган борми юлдузларнинг висолига,
Тўйган борми бу дунёда субҳидамнинг жамолига,
Қачон кундуз етишгайдир зарнигор бу ҳилолига!? -
Йироқлашар дийдорларинг борган сари, ёрижоним,
Ҳижронларга қолмади ҳеч на тоқат-у ҳолу-жоним.

Гоҳи зарда айлар қуёш қовоқларин уйиб-уйиб,
Не бўлди, кўр, дейди менга, мажнунлар ҳам суйиб-суйиб?!
Девоналар бўлди ... Davomi »